ՀԱՆԴԻՊՈՒՄ ՀԱՅԱՍՏԱՆԻ ՀԱՆՔԱԳՈՐԾՆԵՐԻ ԵՎ ՄԵՏԱԼՈՒՐԳՆԵՐԻ ՄԻՈՒԹՅՈՒՆՈՒՄ

Հայաստանի հանքագործների և մետալուրգների միությունում մշակվում է ոլորտի ընկերությունների հետ համագործակցության նոր ռազմավարություն, որն ավելի արդյունավետ կարող է դարձնել հասարակական կազմակերպության դերակատարությունը թե առանձին վերցված ընկերությունների և թե ընդերքի շահագործման ընդհանուր իրավիճակի բարելավման գործում: Այս ուղղությամբ տարվող աշխատանքների համատեքստում տեղի ունեցավ հանդիպում մատակարար ընկերությունների ղեկավարների և պատասխանատուների հետ:

Միության նախագահ Հայկ Ալոյանը ներկայացրեց կազմակերպության նոր հայեցակարգի մշակման ելակետային դրույթները, որտեղ առաջնային պլան է մղվում Միություն-անդամ կազմակերպություններ փոխշահավետ համագործակցության սկզբունքը: Սա նշանակում է, որ Միության գործադիր մարմնի աշխատանքի առանցքում լինելու են նրա անդամների կոնկրետ խնդիրներին լուծումներ գտնելուն միտված քայլերը, դրանց արդյունքների մասին ամենամյա հաշվետվողականությունը:

Հանքարդյունաբերության ոլորտին ժամանակակից տեխնիկա մատակարարող ընկերությունների հայաստանյան ներկայացուցչությունների ղեկավարները, ողջունելով Միության կողմից ձեռնարկած այս քայլը, ուշադրություն հրավիրեցին իրենց հուզող մի շարք խնդիրների և մասնավորապես բանվորական մասնագիտությունների գծով կադրերի պատրաստման և վերապատրաստման համակարգի բացակայության փաստին, նշելով, որ այդ համակարգում  աշխատողների մասնագիտական վարպետությունը մնացել է խորհրդային ժամանակների մակարդակին, իսկ երիտասարդությունը շահագրգռություն հանդես չի բերում դրանց հանդեպ:

Անդրադառնալով այս կարևոր խնդրին, ՀԱՊՃՀ ընդերքաբանության և մետալուրգիայի ֆակուլտետի դեկան Ալբերտ Ֆրանգուլյանը ափսոսանքով նկատեց, որ այս մասնագիտությունների գծով կադրեր պատրաստող  Պոլիտեխնիկի նախկին քոլեջը արդեն երկար ժամանակ չի գործում, այնինչ բուհն ունի ուսուցումը վերակազմակերպելու իրական ներուժ:

Ներկաները քննարկեցին իրենց հուզող առանցքային այլ հարցեր ևս, որից հետո պայմանավորվածություն ձեռք բերվեց խորհրդակցությունների այս գործընթացը շարունակել նաև հանքարդյունահանողների հետ, գտնել ոլորտում կուտակված խնդիրները համատեղ լուծելու կոնկրետ ուղիներ:

Որոշվեց նման հերթական հանդիպումն անցկացնել լեռնային ինժեներներ պատրաստող Հայաստանի ազգային պոլիտեխնիկական համալսարանում:

Ֆոտոռեպորտաժ

«Հայաստանի հանքագործների և մետալուրգների միությունը» իրավաբանական անձանց միություն է: Ստեղծվել է հանքամետալուրգիայի համալիրի միության անդամների ձեռնարկատիրական գործունեությունը համակարգելու, ինչպես նաև ընդհանուր գույքային շահերը ներկայացնելու և պաշտպանելու նպատակով:

Հետադարձ կապ

Էլ.փոստ: hanqmet@mail.ru

Հեռ: +374 (91) 49-03-46

Հեռ: +374 (94) 49-03-46

Ֆաքս: +374 (10) 53-42-52

Հասցե: Հայաստան, Երևան, Սարյան 40/64