Օրերս ՀՀ ԳԱԱ Երկրաբանական գիտությունների ինստիտուտի

Հ.Տ. Կարապետյանի անվան երկրաբանական թանգարանում, Հայաստանի հանքագործների և մետալուրգների միության ակտիվ մասնակցությամբ, նշվեց Երկրաբանի մասնագիտական օրը:

Միջոցառումը ողջույնի խոսքով բացեց ՀՀ ԳԱԱ Երկրաբանական գիտությունների ինստիտուտի տնօրեն Խաչատուր Մելիքսեթյանը:

«Մեկ ուղի, մեկ ճանապարհ /BRISMIS/ խորագրով բնագիտական թանգարանների զարգացման Չինաստանի Ժողովրդադեմոկրատական Հանրապետությունում տեղի ունեցած առաջին միջազգային գիտաժողովի արդյունքների ամփոփում» թեմայով զեկույցով հանդես եկավ երկրաբանական թանգարանի տնօրեն Գայանե Գրիգորյանը:

Ներկաների բուռն հետաքրքրությունն առաջացրեց և քննարկումների առիթ դարձավ հատկապես երկրաբանական գիտությունների դոկտոր Գեորգի Խոմիզուրիի «Երկրաբանական միտքը հին և միջնադարյան Չինաստանում» զեկույցը, որում խոսվեց նաև հայ-չինական պատմական աղերսների և  հետաքրքրություն ներկայացնող այլ իրադարձությունների մասին:

Վերջում միջոցառման մասնակիցները շրջեցին թանգարանում, ծանոթացան Երկրաբանի օրվա խորհուրդը կրող՝ «Քարերի զարմանահրաշ աշխարհը» ցուցադրությանը:

Սեփական լրատվություն